Натпреварите од „МТЕЛ“ Супер лигата во Плеј-аут фазата донесоа нови резултати и промени на табелата, при што фаворитите најчесто ја оправдаа улогата.
МКК Куманово без поголеми проблеми стигна до убедлива победа над Ангели со 96:77. Кумановци уште од стартот ја контролираа играта, водеа по првата четвртина со 21:14, а на полувреме имаа 47:38. До крајот само ја зголемуваа предноста и рутински го приведоа мечот до крај. Најефикасен беше Радукиќ со 23 поени, а Ѓуроски додаде 22, Стевановиќ 17, а Луковиќ 14 поени. Кај гостите се истакна Стефанов со 24 поени.
Феникс 2010 останува во игра за опстанок по победата над Гостивар од 98:85. Домашните имаа постојана предност, водеа 22:17 по првата четвртина, а 43:37 на полувреме. Во продолжение само ја зголемија разликата и мирно го завршија натпреварот.
Рахама постигна 23 поени, а Ниах запиша дабл-дабл од 20 поени и 12 скока. Кај гостите Карахоџиќ реализираше 23 поени.
Работнички направи важен чекор кон опстанокот со победа од 94:83 над Чаир 2030. По израмнетата прва четвртина (22:22), „црвено-белите“ се одлепија до полувреме (53:40) и ја контролираа завршницата. Ефремовски беше најдобар со 28 поени, Грушановиќ додаде 17, а Рикиќ 16. Кај гостите Тачи постигна 22 поени, а Ибраими 18.
Со овие резултати продолжува неизвесната борба во Плеј-аут фазата, каде секој натпревар има голема тежина за конечниот пласман.
