Кошаркарките на Крива Паланка израмнија на 1-1 во полуфиналната серија против Вардар, откако на гостински терен во Скопје славеа со 76:69 и обезбедија трет, одлучувачки натпревар.
Гостинките од самиот старт ја контролираа играта и резултатот. Предводени од одличната Робинсон, уште во првата четвртина направија двоцифрена предност (27:17), а до полувремето ја зголемија на 49:36.
Иако Крива Паланка имаше контрола во најголем дел од натпреварот, во последната четвртина Вардар се врати во игра. По тројката на Тасевска, домаќинките намалија на само 66:68 на две и пол минути до крајот, најавувајќи драматична завршница.
Сепак, решавачки беа поените на Грин, која прво ја прекина серијата на Вардар, а потоа со нови поени ја потврди победата за конечни 76:69.
Во редовите на Вардар, најрасположена беше Алексиќ со 22 поени, Тасевска додаде 21 поен и 13 скока, додека Пислевска постигна 10 поени.
Со оваа победа, серијата се израмни и ќе се игра „мајсторка“ во Крива Паланка, која ќе го даде финалистот во плеј-офот.
