Во Кичево денеска се одржа работна средба меѓу претседателот на Македонскиот олимписки комитет (МОК), Даниел Димевски, членот на Управниот одбор на МОК, Сашо Димитриоски, и градоначалникот на Општина Кичево, д-р Александар Јовановски.
На средбата беа разгледани конкретни насоки за унапредување на спортската инфраструктура во општината, како и за системска поддршка на младите спортисти преку програмите и ресурсите на МОК.
Посебен фокус беше ставен на имплементацијата на олимписките програми за идентификација и развој на млади таленти. Со поддршка од МОК, Општина Кичево ќе развие методологија за рано откривање на спортски потенцијал кај младите, со што ќе се овозможи нивен пристап до стручна работа, обука и стипендии. Целта е Кичево да прерасне во средина која ќе создава нови олимписки надежи и спортисти кои ќе ја претставуваат државата на меѓународна сцена.
Се разговараше и за подобрување на спортската инфраструктура, при што беше истакнат потенцијалот на спортскиот комплекс „Крушино“. Претседателот Димевски нагласи дека Кичево има силна спортска традиција и заслужува да биде дел од пошироки олимписки проекти со кои постоечките капацитети ќе се модернизираат и ќе прераснат во современи тренинг-центри.
Исто така, беше договорено организирање на специјализирана обука за спортска администрација под покровителство на МОК, со цел зајакнување на човечките ресурси и создавање стручен кадар во спортскиот систем.
Градоначалникот Јовановски изрази благодарност за поддршката од МОК, истакнувајќи дека соработката има големо значење за развојот на спортот во Кичево. Претседателот Димевски потенцираше дека МОК останува посветен на развојот на олимпизмот на локално ниво и создавање подобри услови за младите генерации.
