Стартуваше полуфиналната борба за шампионската титула во Првата одбојкарска лига на Македонија во женска конкуренција со првите мечеви.
Работнички со максимални 3-0 во сетови убедливо го доби Младост УГД, среде Штип, иако домаќинот даваше отпор особено во првиот и вториот сет, сепак немаше сили да освои ниту еден сет.
Во првиот сет скопскиот тим беше подобар со 22:25, а во вториот со 24:26, додека пак во третиот сет Работнички беше сигурен со 16:25 за конечни 0-3.
Тамара Стојанова со 14 поени, Марија Василевска со девет и Андротеа Милевска со осум поени беа најефикасни во победничкиот тим.
Реваншот се игра во Скопје в понеделник.
Екипата на Наковски Волеј со 3-1 во сетови го победи актуелниот шампион Јанта Волеј во првиот полуфинален дуел.
Првиот сет го доби струмичкиот тим со 25:18, а пак вториот сет му припадна на скопскиот тим со 22:25. Во следните два сета подобар беше тимот на Наковски Волеј со 25:19 за 2-1 во сетови и 25:21 за конечни 3-1 во сетови.
Мечот беше доста неизвесен, а како и во претходните меѓусебни дуели противниците тактички се надмудруваа, но константноста во играта која е одлика на девојките на Наковски сезонава одново беше клучен фактор за победата.
Реваншот се игра в понеделник во Скопје.
