Фудбалската репрезентација на Македонија на 29 мај ја очекува силен пријателски тест, откако ќе гостува кај Босна и Херцеговина на легендарниот стадион „Кошево“ во Сараево, каде се најавува вистински спектакл со околу 30.000 гледачи на трибините.
Од босанските медиуми веќе пристигнуваат повици за масовна поддршка, со цел стадионот да биде исполнет до последно место и да се создаде атмосфера во која навивачите ќе ја имаат улогата на „12-ти играч“ пред настапот на БиХ на Светското првенство.
За домашната селекција, овој дуел ќе биде генерална проба пред Мундијалот, до кој стигнаа по драматичниот бараж, елиминирајќи ја Италија на пенали. Очекувањата се дека натпреварот ќе донесе силна енергија и поддршка за репрезентацијата пред заминувањето на големата сцена.
Од друга страна, Македонија ќе го искористи овој натпревар како сериозен тест и можност за подигнување на формата, по последните резултати во бараж-циклусот. По дуелот во Сараево, македонската селекција ќе одигра уште една контрола, овојпат против Турција, која исто така ќе биде дел од Светското првенство.
Се очекува дуел исполнет со емоции, силен ритам и одлична атмосфера – вистинска увертира за големото фудбалско лето.
