Третолигашот Славеј од Мешеишта вечерва реагираше со соопштение за судиската арбитража од денешниот меч од 10. коло во Трета лига – Југозапад, кој го загуби со 2:0 од ланскиот второлигаш Караорман од Струга, за што објави Спортска Мрежа.
Клубот од Мешеишта реагира за судиската арбитража, во самото сооштение се вели дека ФК Славеј бил оштетен од судиската тројка, а преку самото соопштение клубот прашува на кого му смета ФК Славеј?
- ЦЕЛОСНО СООПШТЕНИЕ НА ФК СЛАВЕЈ – МЕШЕИШТА:
„На кого му пречи ФК Славеј ? На денешниот натпревар од третата лига Југозапад против ФК Караорман, ФК Славеј – Мешеишта уште еднаш беше видно оштетен од судиската тројка. Главниот судија Владимир Ѓоргиевски, заедно со помошниците Маријан Василевски и никој друг освен Горан Танчевски уште еднаш во центарот на вниманието, одиграа одлучувачка улога за исходот на натпреварот. Уште од првиот свиреж беше јасно кој тим доминира и создава прилики. Сепак, не требаше долго за да интервенираат судиите. Во рок од 10 минути, чистиот црвен картон на играчот на Караорман остана неказнет, бидејќи судијата тврдеше дека е „прерано“ во натпреварот. Сепак, само 15 минути подоцна, во сличен инцидент, нашиот играч Димитар Аќимовиќ доби директен црвен картон – одлука што неволно ја прифаќаме, иако не можеме да ги игнорираме двојните стандарди во игра. Дури и со десетмина, ФК Славеј ја контролираше играта и создаваше шанси. Но, очигледно тоа не беше доволно за да ги задоволи судиите. Во 70. минута, судијата Ѓоргиевски досуди комичен пенал против нас, наместо очигледен прекршок во напад. Кој има право вака да манипулира со судбината на ФК Славеј? И зошто Горан Танчевски, познато лице во нашите судски кошмари, постојано се доделува на нашите натпревари? Како тоа да не беше доволно, Љупчо Мојсоски по некоја чудна „случајност“ се назначи за контролор на овој натпревар. Бараме правичност и транспарентност – ништо повеќе, ништо помалку“, се вели во соопштението на ФК Славеј од Мешеишта.
