Тимот на АП Брера е во низа од три натпревари без победа во Првата фудбалска лига, но мора да се напомене дека во тој период играше против трите водечки екипи на табелата, ремизираше против Струга Трим Лум и против Шкендија, а минимално загуби од Вардар со гол примен од пенал во 95.минута.
Ова значи дека формата не е во опаѓање, туку допрва следат натпреварите на кои избраниците на Мартин Алаѓозовски ќе освојуваат бодови.
Струмичани денеска гостуваат во Кавадарци и ќе ги одмерат силите со Тиквеш, кој нанижа три последовни победи.
„Тиквеш е квалитетен тим, а посебно добро игра пред своите гледачи. Но, ние сме подготвени за надигрување и ќе сториме сѐ за да извлечеме позитивен резултат од ова гостување“, истакна тренерот на АП Брера, Мартин Алаѓозовски.
Натпреварот меѓу Тиквеш и АП Брера е закажан за 14:30 часот на Градскиот стадион во Кавадарци.
