Денеска беа одиграни натпреварите од 20. коло во Втората македонска фудбалска лига, во кое фаворитите во најголем дел ја оправдаа улогата и стигнаа до нови бодови.
Екипата на Брегалница на домашен терен ја совлада Саса со 3-1. Костадин Капсаров од пенал го отвори резултатот, а Ристе Темелков во 29. минута погоди за 2:0.
По една не многу зрела шанса Бурим Алиев погоди за 2:1 на полувреме. Во вториот дел Капсаров со втор гол ги постави конечните 3:1.
Скопје одигра убедлив натпревар во Прилеп и славеше над Победа со високи 0-5. Стрелци беа Јорго Папули, Иса Армир и Тео Мировски, а два гола даде Симеон Христов.
Минимални победи забележаа Шкендија Арачиново, која со 1-0 го совлада Детонит Плачковица, стрелец беше Џихан Адили, како и Охрид, кој со ист резултат триумфираше на гостувањето кај Кожуф во Гевгелија, со голот на Јахја Абдулхади.
Со победа од 2:0 до трите бода стигна и Осогово, кој славеше против Големо Коњари со головите на Дамјан Стојковски и Филип Димоски, додека Беласица беше сигурна на домашен терен и со 3-0 ја победи екипата на Слога Виница, со двата гола на Бујар Иљази и голот на Александар Милушев.
Интересно беше и на останатите средби, каде Вардар Неготино со 2-1 ја совлада Преспа, откако Дарко Донов погоди за 1:0, а Алекс Горгиовски Константино за двојна предност на неготинци. Елмаз Емуш го ублажи поразот на 2:1.
Со ист резултат Тетекс славеше против Новаци на домашен терен. Александар Анастасијески донесе водство за домаќинот, а Андреј Сиљаноски израмни на 1:1.
Во вториот дел Азис Јамини погоди за конечни 2:1.
