Ракометарите на Вардар вечерва ќе го одиграат последниот натпревар од главната рунда во Лигата на Европа, во кој ќе се соочат со германски Мелсунген. „Црвено-црните“ веќе имаат обезбедено место во елиминациската фаза, но пред нив стои можност и за директен пласман во четвртфиналето.
Македонскиот вицепрвак во моментов го има загарантирано најмалку второто место во групата, што носи настап во осминафиналето. Сепак, тимот има шанса да заврши и на врвот, позиција што обезбедува директен билет меѓу осумте најдобри во натпреварувањето.
Во пресрет на последниот дуел, вардарци имаат и мала предност – реми против германскиот состав ќе биде доволно за да ја задржат првата позиција, со оглед на тоа што славеа на првиот меѓусебен натпревар со Мелсунген.
Тренерот Иван Чупиќ за гостувањето во Германија ќе може да смета на речиси комплетен состав, иако веќе викендов Вардар го очекува уште еден важен предизвик на домашната сцена – дерби гостувањето кај Еурофарм Пелистер во Битола.
Исто така, и тренерот Роберто Гарсија Парондо ќе ги има на располагање играчите кои претходно паузираа поради повреди, па се очекува интересна и неизвесна пресметка.
За вардарци задачата е јасна – позитивен резултат против Мелсунген значи прво место во групата и директен пласман во четвртфиналето на Лигата на Европа.
