Кошаркарската федерација на Македонија објави дека на нашата држава и е доверена организацијата на Европското првенство за играчи до 16 години – Б дивизија, кое ќе се одржи од 5 до 16 август.
Довербата од европската кошаркарска федерација претставува потврда за организациските капацитети на КФСМ и за континуираната работа во развојот на кошарката во Македонија.
Со цел дополнително да се промовира спортот и да се доближи до поголем број љубители, шампионатот за првпат ќе се организира во два града – Скопје и Гевгелија.
Досега ваквите меѓународни настани најчесто се одржуваа во главниот град, но овојпат идејата е кошаркарската атмосфера да се прошири и во други средини. Изборот на Гевгелија претставува можност градот да се претстави како успешен домаќин со својата инфраструктура, гостопримство и организациски потенцијал.
Европското првенство ќе биде шанса младите кошаркарски таленти од повеќе земји да се претстават во Македонија, но и уште една потврда за посветеноста на државата кон развојот на младинскиот спорт.
Кошаркарската федерација, во соработка со локалните институции и партнери, најавува организација на настан на високо ниво, кој ќе биде пример за професионалност, спортски дух и гостопримство.
