Еурофарм Пелистер продолжува сигурно во пролетниот дел од Суперлигата, откако на гостувањето кај Радовиш забележа убедлива победа од 17:42 во рамки на 20. коло. Тимот на Стевче Алушовски одигра колку што беше потребно во првиот дел, а потоа во продолжението целосно го „скрши“ отпорот на домаќинот.
Радовиш парираше во воведните минути и одржуваше негатива од неколку гола, но квалитетот на битолчани постепено дојде до израз. На паузата резултатот беше 11:16, а клучниот момент се случи на стартот од второто полувреме кога „зелено-белите“ направија серија од осум погодоци по ред и ја одведоа средбата во еднонасочна улица.
До крајот, Еурофарм Пелистер ја демонстрираше својата моќ во транзиција и со цврста одбрана дозволи само шест гола во вторите 30 минути. Филип Кузмановски беше перфектен со девет реализации, Атанасијевиќ и Хекбарт додадоа по седум, а голманот Брестовац имаше значаен придонес меѓу стативите. Кај домаќините, Јанковски постигна четири гола.
Со новите бодови, Еурофарм Пелистер се врати на второто место со 34 бода, зад Вардар, а пред Охрид. Радовиш останува на дното без освоен бод и веќе е јасно дека клубот пролетва настапува со подмладен состав и без посериозни засилувања. Со оглед на состојбата, тимот практично е со „спакувани куфери“ за преселба во Првата лига.
Во следното коло Пелистер го пречекува Прилеп, додека Радовиш повторно ќе биде домаќин, овојпат на Еурофарм Пелистер 2.
