Во возбудлив натпревар од 20. коло во ракометната Суперлига, Пролет и Струга одиграа нерешено 28-28 во салата „Македонско Сонце“, во меч кој понуди пресврти, црвен картон и драматична завршница во која гостите имаа и напад за цел плен.
Стружани храбро го отворија дуелот и поведоа со 4-2 и 5-3, одржувајќи резултатска неизвесност до средината на првиот дел. Сепак, домаќините фатија ритам и со серија голови стигнаа до 10-7, а на паузата заминаа со солидни 18-14.
Ништо не беше решено. Гостите силно тргнаа во второто полувреме и за кратко време намалија, а потоа и израмнија на 19-19. И покрај директниот црвен картон за Дарио Симоновски во 39. минута, Струга не се распадна. Пролет повторно се одлепи на „плус четири“ (24-20), но борбените стружани се вратија и во финишот преку Мечкароски израмнија на 28-28.
Во последните секунди гостите добија шанса и за победа, но ударот на Мајдоуб заврши над голот.
Давор Палески блесна со 11 погодоци кај Пролет, додека Наум Костов постигна 10 за Струга.
Со овој бод, Струга се одлепи на седум бодови од „фенерџијата“ Радовиш, се израмни со Куманово на делба на десеттото место и сериозно најави битка за директен опстанок во елитата.
