Дисциплинската комисија на Фудбалската федерација на Македонија, постапувајќи по пријава на Управниот одбор, му изрече дисциплинска мерка забрана за вршење функција во траење од две години на Муамед Сејдини, делегат на Собранието на ФФМ.
Санкцијата е изречена поради сторено дејствие „измама и доведување во заблуда орган на фудбалска организација“, согласно член 84 од Дисциплинскиот правилник.
Како што е утврдено, Одборот за итност на ФФМ на 27 ноември 2024 година прифатил понуда од ДПТУ „Енергоинвест Трејд“ ДОО Скопје за изградба на трибина на стадионот „Билјанини Извори“ во Охрид, во вредност од 202.919.610 денари без ДДВ, без услов за авансно плаќање, при што Сејдини бил овластен да го потпише договорот.
Одлуката подоцна била потврдена и од Управниот одбор на ФФМ. И покрај тоа, на 3 декември 2024 година, Сејдини потпишал договор со вметнат услов за авансно плаќање од 20 проценти, кој не бил дел од прифатената понуда. Авансот бил исплатен без обезбедена банкарска гаранција и без соодветно овластување.
Со ваквото постапување, Дисциплинската комисија утврди дека Муамед Сејдини го довел во заблуда Управниот одбор на ФФМ и нанел сериозна материјална штета на Федерацијата, поради што му е изречена двегодишна забрана за вршење функција.
