Ланскиот прволигаш Гостивар е на добар пат да се врати во Трета лига, откако клубот кој сега се натпреварува во општинската лига е лидер на табелата.
Клубот доби финансиска поддршка од општината, за што клубот се заблагодари на поддршката која ја има од градот.
„Во име на Фудбалскиот клуб Гостивар, играчите, стручниот штаб и сите наши спортски поддржувачи, сакаме да ја изразиме нашата искрена благодарност за континуираната поддршка и, особено, за последната финансиска помош доделена на нашиот клуб. Во период исполнет со бројни предизвици за спортот, вашата помош е од суштинско значење и ни овозможува да го одржиме фудбалскиот клуб што го носи името на нашиот град. Поддршката од Општина Гостивар ни дава дополнителна сила и одговорност достоинствено да ги претставуваме боите на градот на секој натпревар. Убедени сме дека со ваков дух на соработка, заедничките успеси нема да изостанат. Ви благодариме за довербата и за тоа што секогаш сте покрај нас, со надеж дека вашата поддршка ќе продолжи и во иднина, за доброто на гостиварскиот спорт“, велат од клубот.
Клубот во своите редови врати пет свои поранешни фудбалери – се работи за Генц Гаши, Рони Синани, Зеќир Сефери, Горан Новаковски и Месут Шабан.
24-годишниот Гаши доаѓа од редовите на Тетекс, а во минатото покрај за „штофарите“ и Гостивар настапуваше и за Беса од Добри Дол и Шкендија. Синани, исто така има 24 години, а во Гостивар доаѓа од редовите на поранешниот прволигаш Беса, има настапувано и за Дрита, Вардар Форино и Шкендија.
Сефери кој има 27 години, исто така е повратник кој доаѓа од лидерот во Трета лига – Запад, Камјани, беше дел и од тетовски Ес и Сермнова. Меѓу поискусните е Новаковски, 34-годишникот кој во минатото долги години беше дел од Пролетер од Тумчевиште. Шабани е млад фудбалски талент кој потекнува од школата на Гостивар, а кој во март полни 16 години.
Во пролетниот дел тимот ќе цели кон потврда на првото место и враќање во Трета лига за следната сезона, а потоа сигурно е дека тимот ќе сака и враќање во Втора лига. Откако минатата сезона Гостивар се откажа од натпреварување беше префрлен од Прва лига во Општинската лига која е Четврт ранг по натпреварување во македонскиот фудбал.
