Ракометната репрезентација на Германија е првиот финалист на Европското првенство 2026, откако во полуфиналната пресметка славеше над Хрватска со 31:28. „Панцерите“ ја решија дилемата околу победникот со силен старт на второто полувреме и ќе се борат за златниот медал против подобриот од дуелот меѓу Данска и Исланд.
Полуфиналето донесе изедначена и борбена игра во првиот дел. Двете селекции се менуваа во водство, а разликата ретко надминуваше еден гол. Во финишот од полувремето Германија направи мала серија и на паузата замина со предност од 17:15.
Клучниот момент се случи на стартот од второто полувреме, кога Германците со серија од 5:1 се одлепија и за кратко време стигнаа до висока предност. Во еден период имаа и седум гола разлика, што им овозможи мирна контрола на натпреварот. Хрватска не се предаде, се обиде со игра „седум на шест“ и во самиот финиш се доближи на минус два, но за целосен пресврт немаше сили.
Најефикасен во победничкиот состав беше Лукас Зербе со шест погодоци, додека значаен придонес имаше и голманот Андреас Волф со 13 одбрани. Кај Хрватска, најмногу се истакна Тин Лучин со шест гола, а поддршка доби и од Кларица и Мартиновиќ.
Со овој триумф Германија обезбеди финале на континенталниот шампионат и шанса повторно да се бори за европската круна, додека Хрватска ќе има можност да стигне до медал во натпреварот за третото место.
