Искусниот стратег Емил Грнев кариерата ја продолжува во Малта, каде ќе го води клубот Санта Луција, а со него на островот доаѓа и Борче Постолов кој ќе биде дел од стручниот штаб како прв асистент.
Штипските тренери ќе соработуваат и со Португалецот, Рубен Круз кој е одличен аналитичар и ќе работи во стручниот штаб на Грнев.
Грнев последно работеше како шеф на стручниот штаб на Слога Виница, а 42-годишниот стратег во минатото ги водеше Кит Го од Пехчево како и Брегалница од Штип.
Во клубот од Малта настапува напаѓачот Филип Петковски, со кој Грнев соработуваше во Слога Виница, тука е и стоперот Андреј Кировски, кој заедно со Петковски настапуваше во Гостивар. Во тимот на Грнев има уште еден поранешен играч на Гостивар, Масаки Тахакара.
Новиот тим на Грнев се наоѓа на 11. место на табелата во Втората лига на Малта, а пролетниот дел во шампионатот започнува на почетокот од месец февруари односно следниот викенд кога Санта Луција на домашен терен ќе се соочи со третопласираниот тим Мелита.
Ова ќе биде ново искуство и нов предизвик во кариерите на Грнев и Постолов кој ќе работат на островот.
Овој клуб го презедоа старите турски газди од Гостивар, а веќе во истиот доаѓаат доста добро познати имиња од македонскиот фудбал.
