По настапот во квалификациите на Австралија опен, нашата најдобра македонска тенисерка Лина Ѓорческа со победа го започна настапот на фјучрс турнирот во Порто, кој се игра за награден фонд од 60.000 долари. Во мечот од првото коло, Ѓорческа ја совлада Ралука Шербан од Кипар со 2:0 во сетови (6:4, 6:4), што претставува нејзина трета победа во исто толку меѓусебни дуели со оваа ривалка.
Во првиот сет, двете тенисерки имаа проблеми на свој сервис на самиот почеток, но Ѓорческа прва успеа да направи разлика, поведувајќи со 4:2 во гемови. Македонската тенисерка го задржа ритамот и стигна до водство од 5:2, по што Шербан успеа да намали на 5:4. Сепак, Ѓорческа сигурно го одигра десеттиот гем и го доби сетот со 6:4.
Во вториот сет, кипарската тенисерка имаше предност од 4:2, но Ѓорческа одговори со серија од четири освоени гема и со тоа го затвори сетот со 6:4, а мечот со убедливи 2:0 во сетови.
Во следното коло, Ѓорческа ќе се соочи со победничката од дуелот меѓу Настасја Шунк од Германија и Ајла Аксу од Турција.
