Дебитантот во Првата македонска фудбалска лига, екипата на Арсими, сериозно ја засилува конкуренцијата во пресрет на пролетниот дел од сезоната. Клубот официјално ги претстави двете нови имиња во ростерот – искусниот дефанзивец Џелил Абдула и напаѓачот од Уганда, Фахад Бајо.
Во дефанзивната линија пристигнува 34-годишниот Џелил Абдула, фудбалер со богато домашно и меѓународно искуство, кој во Арсими доаѓа од редовите на Македонија Ѓорче Петров. Во својата кариера има настапувано за Шкендија, Еуромилк ГЛ, Ренова, Шкупи, Гостивар и Македонија ЃП, а дел од фудбалскиот пат го мина и надвор од Македонија, настапувајќи за Де Графсхап од Холандија, МСВ Дуизбург од Германија и Љапи од Косово. Абдула зад себе има и шампионска титула – во сезоната 2010/2011 беше дел од генерацијата на Шкендија што го освои шампионатот на Македонија.
Од клубот веруваат дека неговото искуство и стабилност ќе бидат од клучно значење во продолжението на сезоната.
Во офанзивниот дел, Арсими се засили со Фахад Бајо, 27-годишен напаѓач и репрезентативец на Уганда, кој пристигнува на шестмесечна позајмица од Вардар. Бајо има 25 настапи и шест погодоци за националниот тим на Уганда, а зад себе има интернационална кариера во повеќе шампионати. Настапувал за Пролајн и Вајперс во Уганда, Билдкон од Занзибар, израелските Ашдод и Бнеи Сахнин, потоа за МФК Вишков од Чешка, како и за Волвало Адеграт од Етиопија.
Од Арсими очекуваат неговата физичка моќ, искуство и голгетерски инстинкт да донесат директен импакт во нападот.
Арсими ја живее својата прволигашка премиера оваа сезона и по есенскиот дел пријатно изненади, завршувајќи на високото петто место на табелата. Пролетниот дел од шампионатот за тимот од Чегране започнува со голем предизвик – гостување кај Вардар, клубот од кој доаѓа едно од новите засилувања.
Со Абдула и Бајо во ростерот, Арсими испраќа јасна порака дека амбициите за стабилна и успешна сезона во елитата остануваат високи.
