Голема сензација беше забележана во третото коло од главната фаза на Европското првенство, откако репрезентацијата на Шпанија ја совлада фаворизираната Франција со 36-32 и ја врати неизвесноста во таканаречената „група на смртта“.
Иако веќе без реални шанси за пласман меѓу најдобрите, Шпанците одиграа еден од своите најдобри натпревари на турнирот. Клучната разлика ја направија во првото полувреме, кога со одлична одбрана и ефикасен напад стигнаа до убедлива предност од 20-14 на паузата.
Во вториот дел Франција се обиде да се врати во натпреварот и во неколку наврати намали на минус два и минус три, но „фуријата“ не дозволи целосен пресврт. Со мирна и контролирана игра во завршницата, Шпанија го задржа водството и ги освои првите бодови во оваа фаза од шампионатот.
Најрасположен кај победниците беше Иан Баруфет со десет постигнати голови, додека значаен придонес имаше и голманот Сергеј Ернандез со низа клучни интервенции. Кај Франција, Ајмерик Мин се истакна со седум погодоци.
Со овој пораз, Франција остана на четири бода и повеќе не зависи само од себе во борбата за полуфинале, а исходот од дуелите меѓу Данска и Германија, како и директниот меч со „панцерите“, ќе имаат клучно значење за понатамошниот тек на турнирот.
