Две работи во Втората женска фудбалска лига се кристално јасно – непоразениот лидер Конзули е сигурен патник кон Првата лига, па со тоа битолскиот тим по неколку години ќе се врати во елитниот фудбал во женска конкуренција.
Како што веќе објави Спортска Мрежа клубот се подготвува за пролетниот дел, ростерот е сочуван, а ќе има неколку пријателски натпревари за проверка на формата.
Тоа значи дека битката ќе биде за второто место кое води кон баражот за влез во Првата лига, а битка ќе ја водат две екипи – Порече од Македонски Брод и Билјанини Извори од Охрид.
Екипата од Македонски Брод е на второто место со 16 бодови, а пак тимот од Охрид има три бодови помалку и се наоѓа на третото место.
Екипата која ќе заврши на второто место ќе се подготвува за бараж против прволигашот кој сезоната ќе ја заврши на претпоследното деветто место во Првата лига. Таму пак речиси сигурно е дека битката околу баражот ќе ја водат Кочани и Топ Гол од Битола, односно ќе се борат да го избегнат последното место кое директно води кон испаѓање во Втората лига, а да се обезбеди баражот, бидејќи веќе конкурентите Вардар и Речица имаат бодовна залиха и поголем квалитет.
