Фудбалскиот клуб Башкими 1947 официјално го промовираше Никел Роналдо Ор како најново засилување за продолжението од сезоната во Првата лига. Станува збор за 24-годишен офанзивец од Тринидад и Тобаго, кој најчесто настапува на левата крилна позиција.
Ор во Куманово пристигнува од редовите на кипарскиот ПАЕК, а во клубот го опишуваат како модерен фудбалер со изразен фудбалски интелект, добра физичка подготвеност и брзина, квалитети со кои треба да донесе дополнителна енергија и стабилност во офанзивната линија на тимот.
Раководството на Башкими верува дека новото засилување брзо ќе се вклопи во клупската филозофија и ќе даде значаен придонес во остварувањето на целите во пролетниот дел од сезоната. Трансферот, воедно, е уште една потврда за амбициите на клубот да гради цврста и конкурентна екипа со јасен идентитет.
Башкими моментално e на подготовки во Хрватска, а пролетниот дел од шампионатот ќе го отвори со гостување кај Силекс во Кратово, натпревар на кој новиот фудбалер би можел да го има своето деби во дресот на кумановскиот прволигаш.
