Ракометарите на Охрид на одличен начин го отворија пријателскиот циклус во Србија, забележувајќи убедлив триумф против домашниот Врбас од 40-21.
Македонскиот тим рано ја презеде контролата врз натпреварот, а решавачката предност ја изгради уште во првиот дел, по кој на семафорот стоеше 22-13 во корист на гостите. Во продолжението, Борис Ројевиќ им даде можност на сите расположливи ракометари, но односот на силите остана непроменет.
Најефикасен во победничкиот табор беше новото засилување Прибетиќ со седум погодоци, додека Јагуриноски уште еднаш покажа дека се наоѓа во одлична форма, постигнувајќи пет гола. Своја улога во напаѓачката доминација имаа и Ојлески и Стрмљан, кои по четири пати ја затресоа противничката мрежа.
По натпреварот, „гладијаторите“ остануваат во Врбас уште два дена, каде ќе продолжат со тренинзите, пред преселбата во Белград. Таму охриѓани ќе настапат на меморијалниот турнир „Вук Рогановиќ“.
Во полуфиналето, закажано за 16 јануари, Охрид ќе се соочи со екипата на Динамо Панчево, додека во вториот полуфинален дуел ќе се сретнат Партизан и словенечкиот Тримо Требње.
