Роџерс Мато ќе ја продолжи кариерата во шкотската Премиер лига, откако Хартс официјално потврди дека постигнал договор со офанзивецот на Вардар за трансфер по завршувањето на сезоната. Репрезентативецот на Уганда во јули ќе се пресели во Единбург како слободен играч и ќе потпише договор на три години.
Иако постоеја обиди Мато да биде задржан во Скопје, договорот со „црвено-црните“ истекува на лето, а шкотскиот клуб уште претходно го имаше идентификувано како приоритетно засилување. Интересот на Хартс беше актуелен и во зимскиот преоден рок, но тогаш не дојде до реализација на трансферот.
Од Хартс потенцираат дека Мато зад себе има извонредна сезона и дека станал еден од најбараните напаѓачи во Европа благодарение на својата ефикасност. Во актуелната сезона 2025/26, крилниот напаѓач постигна 12 голови на 13 натпревари, со што даде голем придонес Вардар да се искачи на врвот на табелата. Претходно, во својата прва сезона во клубот, Мато помогна Вардар да обезбеди пласман во квалификациите за Конференциската лига и да го освои Купот на Македонија.
Фудбалската приказна на 22-годишниот Мато започна во родната Уганда, како продукт на Пролин ФК од Кампала, по што настапуваше во домашната Премиер лига. Првото европско искуство го имаше во Турција со Шанлиурфаспор, а во македонскиот фудбал пристигна во февруари 2024 година, кога потпиша за АП Брера. Една година подоцна беше ангажиран од Вардар, каде експлодираше со своите настапи.
Мато има и значајна улога во националниот тим на Уганда. Деби за „Жеравите“ забележа во 2022 година, а досега има 41 настап и осум погодоци, меѓу кои и гол на последниот Африкански куп на нации.
Со трансферот во Хартс, Мато од лето ќе го замени Балканот со Единбург и ќе стане дел од екипата предводена од Дерек МекИнс, додека Вардар ќе мора да бара ново офанзивно решение за следната сезона.
