Ракометарите на Еурофарм Пелистер 2 со работен состанок и првиот тренинг официјално ги започнаа активностите за вториот дел од сезоната во Суперлигата. Тренерот Александар Зарков на првата прозивка ги имаше на располагање речиси сите ракометари од есенскиот дел, со кои ќе се обиде во последните четири кола да избори место во плеј-офот.
Подготовките ќе се реализираат во Битола, а тимот секојдневно ќе тренира во спортската сала „Боро Чурлевски“. Во рамки на подготвителниот период планирани се и три контролни натпревари – два теста против Прилеп на 23 и 25 јануари, како и дуел со Младост од Богданци на 30 јануари.
Еурофарм Пелистер 2 есенскиот дел од сезоната го заврши на седмото место со 17 бодови, само еден помалку од Тиквеш и Бутел, кои се на позициите што водат во плеј-офот. Во трката за петтото и шестото место ќе се вклучат и Прилеп, кој е осми со 16 бодови, што најавува исклучително неизвесен финиш на регуларниот дел.
Првиот официјален натпревар во 2026 година, младите „пелистерци“ ќе го одиграат на 7 февруари, кога ќе се сретнат со првиот тим на Еурофарм Пелистер.
Тренерот Александар Зарков е свесен за тежината на задачата, но верува дека тимот ќе го даде максимумот во завршницата од сезоната.
„Денес ги започнавме подготовките за вториот дел на првенството, сите тренинзи ќе ги одработиме во Битола. Имаме план и програма како физички, така и тактички да ја подготивме екипата. Имаме договорено пријателски натпревари со Прилеп на 23 и 25 јануари и со Младост од Богданци на 30 јануари. Имаме уште четири кола, од нив две мораме да ги добиеме со Струга и Радовиш. Најлошо е кога ќе чекаш некој друг од некој да загуби за да влеземе во плеј-оф. Има уште шанси, не зависи од нас, нашето ќе го направиме сигурно тоа што е зацртано. Ќе одиме на победа како на секој натпревар, ако обезбедиме плеј-оф ќе биде супер, ако не одиме, ако не во плеј-аутот ќе влеземе со сите бодови“, рече тренерот на Еурофарм Пелистер 2, Александар Зарков.
Со јасна цел и прецизен план, Еурофарм Пелистер 2 влегува во продолжението од сезоната со надеж дека ќе успее да избори место меѓу најдобрите и да обезбеди пласман во плеј-офот.
