Ракометниот суперлигаш Бутел Скопје официјално ги започна подготовките за пролетниот дел од сезоната, со јасна цел да обезбеди пласман во разигрувањето за титулата во Супер лигата.
Под водство на стратегот Горан Кузманоски, беше одржана првата прозивка, на која се појавија и двете нови засилувања во тимот. Станува збор за левиот бек Христијан Ѓурмешевиќ, младински репрезентативец на Македонија кој пристигнува од Мулти Есенс, како и за пивотот Матеј Марковски, досегашен член на Аеродром.
Во продолжението од сезоната, Бутел Скопје нема да може да смета на услугите на Филип Николов, Рио Козакаи и Давид Гришикашвили, па стручниот штаб ќе го темели ростерот на млад и мотивиран состав, кој веќе покажа дека може рамноправно да се носи со конкурентите.
Подготовките ќе се реализираат во Скопје, а до стартот на официјалните натпревари планирано е одигрување на четири пријателски средби, кои ќе послужат за воигрување и проверка на формата.
Со оглед на моменталниот пласман и потенцијалот на екипата, Бутел Скопје е на чекор до обезбедување место во плеј-офот, што претставува голем успех за еден од најмладите тимови во суперлигашката конкуренција.
