Ракометарите на Еурофарм Пелистер 2 официјално ги стартуваа подготовките за вториот дел од сезоната, како што веќе информираше Спортска Мрежа, со јасна цел – борба до крај за место во плеј-офот на Суперлигата. Екипата ќе тренира во Битола, а во подготовките се планирани и три контролни натпревари против Прилеп и Младост Богданци.
Тимот презимува на седмото место со 17 бодови и на последните четири кола од регуларниот дел ќе влезе со реални, но тешки шанси за пласман меѓу најдобрите шест екипи.
Тренерот Александар Зарков истакнува дека фокусот е исклучиво на сопствените настапи, без калкулации и чекање на туѓи резултати.
„Денес ги започнавме подготовките за вториот дел на првенството, сите тренинзи ќе ги одработиме во Битола. Имаме план и програма како физички, така и тактички да ја подготивме екипата. Имаме договорено пријателски натпревари со Прилеп на 23 и 25 јануари и со Младост од Богданци на 30 јануари. Имаме уште четири кола, од нив две мораме да ги добиеме со Струга и Радовиш. Најлошо е кога ќе чекаш некој друг од некој да загуби за да влеземе во плеј-оф. Има уште шанси, не зависи од нас, нашето ќе го направиме сигурно тоа што е зацртано. Ќе одиме на победа како на секој натпревар, ако обезбедиме плеј-оф ќе биде супер, ако не одиме, ако не во плеј-аутот ќе влеземе со сите бодови“, рече тренерот на Еурофамр Пелистер 2, Александар Зарков.
Во трката за плеј-оф, покрај Еурофарм Пелистер 2, влегуваат и Тиквеш, Бутел и Прилеп, а расплетот се очекува во последните четири кола. Првиот официјален натпревар во 2026 година битолчани ќе го одиграат на 7 февруари, против шампионот Еурофарм Пелистер.
