Прволигашот Арсими од денеска се сели во Хрватска, каде што ќе ја одработи зимската подготвителна фаза во пресрет на вториот дел од сезоната во Првата македонска фудбалска лига.
Тимот од Чегране ќе престојува во Хрватска во период од 10 дена, во кои се планирани и неколку контролни натпревари со реномирани противници. Арсими ќе одигра пријателски средби против Славен Белупо, ХНК Вуковар и НК Приморје, а во најавата стои дека во наредните денови ќе биде потврдена уште една контролна проверка.
На 7. јануари тимот ќе се тестира со Вуковар, на 10. јануари против Славен, а пак на 13. јануари со Приморје, додека пак за 16. односно 17. јануари се бара противник.
Од клубот посочуваат дека оваа подготвителна фаза има за цел максимално професионално да се одработат подготовките и да се подигне конкурентноста на „жолто-црните“, со што екипата што е можно поподготвена да го дочека стартот на пролетниот дел од шампионатот.
Арсими, кој оваа сезона е дебитант во Првата македонска фудбалска лига, есенскиот дел го заврши на одличното петто место со освоени 22 бодови. Во продолжението од сезоната, главната цел на тимот ќе биде директен опстанок во фудбалската елита на Македонија.
Од клубот упатија и благодарност до членовите, дијаспората, спонзорите, навивачите и целата заедница за континуираната поддршка и довербата во спортскиот проект, со порака дека заедно се посилни во остварувањето на зацртаните цели.
