ГРК Охрид на 9 јануари ќе ги започне зимските подготовки за вториот дел од сезоната во Суперлигата, додека пак тимот главната фаза ќе ја реализира во Србија. Охриѓани ќе престојуваат вкупно 10 дена надвор од Македонија, со јасна цел – подготвено да го дочекаат продолжението од Суперлигата.
Од 9 до 16 јануари, тимот ќе биде сместен во Врбас, каде што покрај тренажниот процес ќе одигра и контролен пријателски натпревар. На 13 јануари 2026 година, ГРК Охрид ќе се соочи со домашната екипа на Врбас, во дуел кој ќе послужи како проверка на формата и воигрување на составот.
Веднаш по завршувањето на подготовките во Врбас, охридскиот тим предводен од српскиот стратег Борис Ројевиќ ќе се пресели во Белград, каде што на 17 и 18 јануари ќе настапи на 5. издание на меѓународниот Турнир „Вук Рогановиќ“. Во полуфиналето, ГРК Охрид ќе игра против српскиот претставник РК Динамо Панчево, додека вториот полуфинален пар го сочинуваат РК Партизан (Србија) и РК Тримо Требње (Словенија). Во вториот ден од турнирот ќе се одиграат натпреварите за конечен пласман.
Во овој подготвителен период, стручниот штаб нема да може да смета на Дарко Ѓукиќ и Анте Иванковиќ, кои се дел од националните селекции на Србија и Хрватска и настапуваат на Европското првенство. Од клубот им посакуваат успешни настапи и добри резултати на репрезентативната сцена.
Во меѓувреме, ГРК Охрид беше активен и на трансфер-пазарот. Како што веќе објави Спортска Мрежа, тимот се засили со кружниот напаѓач Џанфранко Прибетиќ и со десното крило Ален Ќосевски, додека клубот се раздели со левиот бек Теимураз Орјоникидзе од Грузија.
По првиот дел од сезоната, Охрид презимува на третото место на табелата со 29 бодови, исто колку и четвртопласираниот Алкалоид. Лидер е Вардар со 34 бодови, додека актуелниот шампион Еурофарм Пелистер е втор со 30 бодови. Со оглед на тесната бодовна разлика, пролетниот дел од сезоната најавува жестока битка за врвот, а ГРК Охрид со сериозен пристап и квалитетни подготовки ќе се обиде да остане во трката за шампионската титула.
