Екипата на Работнички направи уште една промена во играчкиот кадар во пресрет на продолжението од сезоната, откако спогодбено се раздели со грузискиот фудбалер Лука Робакидзе.
25-годишниот играч за врска не беше во прв план кај „романтичарите“ во изминатиот период, а двете страни одлучија соработката да ја прекинат пред истекот на договорот. Робакидзе последен пат настапи на стартот од сезоната, кога запиша четири настапи во првите четири кола од Првата македонска фудбалска лига, по што остана надвор од комбинација.
Во тековната сезона, грузискиот интернационалец собра вкупно 215 минути во првенството, додека во Купот на Македонија одигра едно полувреме. Свое учество имаше и на европска сцена, настапувајќи десет минути во квалификациите за Конференциската лига на УЕФА.
Робакидзе во Работнички пристигна од редовите на Брегалница, а претходно во кариерата настапуваше и за клубови од Чешка и Грузија, меѓу кои Таборско, Самтредиа и Гагра Академија. Во минатата сезона во дресот на Работнички запиша 18 настапи, додека најголем впечаток остави во Брегалница, каде во сезоната 2023/24 одигра 28 натпревари и запиша три асистенции.
Со ова заминување, Работнички продолжува со редефинирање на тимот за вториот дел од сезоната.
