Женскиот Куп „Благоја Георгиевски-Буштур“ влегува во завршната фаза, откако по елиминациските дуели стана јасно кои четири екипи ќе се борат за трофејот. Баскет Кам, Бадел 1862, Крива Паланка и МЗТ Бела вода обезбедија пласман на финалниот турнир по настапите во осминафиналето, во кое учествуваа осумте клуба од „Шпаркасе Лајф“ Првата лига.
Бадел 1862 одигра доминантен меч против Пробаскет и со убедливи 93:62 без дилеми чекореше кон полуфиналето. Натпреварот беше решен уште во првото полувреме, кога „баделки“ изградија висока предност, а до крајот рутински ја зголемуваа разликата. Марија Николов беше лидер со 23 поени, а значаен придонес дадоа и Чолакоска и Клири, која запиша дабл-дабл учинок.
Лидерот во првенството, Крива Паланка, ја оправда фаворитската улога и со 100:50 го совлада Патриот 2016. Прашањето на победникот беше решено уште по првите 20 минути (57:21), по што домашниот тренер им даде шанса на поширокиот ростер. Дури шест кошаркарки завршија со двоцифрен број на поени, што само ја потврди ширината и силата на тимот.
Највозбудливо беше во Скопје, каде МЗТ Бела вода со 77:69 го елиминираше Вардар. Гостинките имаа контрола во поголемиот дел од натпреварот, а клучна фигура беше Корли со дабл-дабл од 18 поени и 12 скока. Иако Вардар се обиде да се врати во финишот, искуството на МЗТ пресуди.
Ден порано, Баскет Кам без проблеми го обезбеди своето место меѓу најдобрите четири со убедлива победа над Спорт тим.
Во полуфиналето ќе се сретнат Крива Паланка и Бадел 1862, односно Баскет Кам и МЗТ Бела вода, а љубителите на кошарката ги очекува возбудлива завршница и битка за Куп-трофејот кај дамите.
