Деветтото коло во Шпаркасе Лајф Првата лига – жени донесе спектакуларни натпревари, убедливи победи на фаворитите и еден резултат што ќе се памети долго. Кошаркарките на Вардар испишаа историја, поставувајќи клупски рекорд по бројот на постигнати поени во сениорска конкуренција, а капитенката Елена Тасевска блесна со трипл-дабл учинок.
Вардар – Патриот 2016 136:35
Скопскиот тим одигра натпревар за аналите, совладувајќи го младинскиот состав на Патриот од Делчево со неверојатни 101 поен разлика. „Црвено-црните“ реализираа дури 136 поени, а дури шест кошаркарки завршија со двоцифрен учинок.
Посебен печат на натпреварот стави капитенката Елена Тасевска, која оствари трипл-дабл – 20 поени, 14 скока и 10 асистенции, дополнети со шест украдени топки, за само 22 минути игра и вкупно 42 индексни поени.
Бадел 1862 – Баскет кам 64:81
Шампионките од Македонска Каменица одиграа зрело и контролирано дерби во Скопје, славејќи убедливо против Бадел 1862. Гостинките ја направија разликата уште во првото полувреме (46:29) и без проблеми ја одржаа предноста до крајот.
Димова беше прво име кај победникот со 24 поени и девет скока, додека Кметовска забележа дабл-дабл (19 поени, 13 скока). Кај Бадел 1862, Николов постигна 16 поени.
Крива Паланка – МЗТ Бела вода 83:48
Лидерот на табелата продолжи со сигурните настапи. Крива Паланка уште во првата четвртина создаде огромна предност (32:8), по што натпреварот доби рутински тек. Алексис Пул доминираше со 29 поени и 11 скока, додека Ниехуес и Груевска дадоа значаен придонес во победата.
Пробаскет – Спорт тим 84:63
Кавадаречкиот состав ја искористи шансата и со сигурна победа над Спорт тим направи скок на табелата. Овој триумф, комбиниран со поразот на Бадел 1862, му овозможи на Пробаскет да се искачи на четвртата позиција.
Табеларна состојба по 9. коло
На врвот нема промени – Крива Паланка, Вардар и Баскет кам имаат идентичен скор (8-1), што најавува исклучително возбудлива продолжница од сезоната.
