Охрид продолжува да ги изненадува фаворитите оваа сезона. Во 17. коло од македонската Супер лига, тимот на Охрид го совлада шампионот Еурофарм Пелистер со 29-25 (13-11) и го запиша својот прв голем триумф против еден од најсилните ривали. Натпреварот се одигра во преполната сала „Билјанини извори“, каде верните навивачи „Рибари“ и „Чкембари“ создадоа одлична атмосфера.
Капитенот на Охрид, Гоце Ојлески, во изјава за Спортска Мрежа, посочи дека победата е резултат на квалитетната и борбена игра на тимот, особено на одбраната, која на овој меч, функционирала беспрекорно. Тој нагласи дека и покрај тоа што Пелистер е фаворит за титулата, охриѓани ги покажале своите квалитети и заслужено го добиле овој меч.
„Пред сè, сакам да им честитам на нашите момци, навистина одигравме еден квалитетен натпревар, борбен пред сè..како што и најавивме пред самиот меч – дека ќе се бориме до крај. Пелистер е фаворит за шампионската титула, меѓутоа и ние имаме свои квалитети коишто денес ги покажавме. Мислам дека пресудна за оваа победа беше одбраната, таа навистина денес функционираше како што треба, можам да кажам дека примивме мал број голови, па според тоа, заслужено и победивме.“- изјави Ојлески за Спортска Мрежа.
Оваа победа, како и победата над Алкалоид во претходните кола, ја потврдуваат амбицијата на Охрид да биде конкурентен на домашната сцена и ја покажува силата на тимот, кој со дисциплина и борбеност успеа да се наметне против еден од најсилните клубови во Македонија.
