Филип Блажевски вчера во Приштина, Косово, го освои бронзениот медал на Европското првенство во теквондо за натпреварувачи до 21 година.
Младиот македонски репрезентативец, член на Теквондо клубот Бутел, настапи во категоријата до 80 килограми и со три победи стигна до одличјето. Блажевски славеше над Александру Манита од Молдавија (2:0), Олександар Јефимов од Украина (2:0) и Ајман Бери од Франција (2:1), обезбедувајќи место на победничкиот подиум.
Во полуфиналната борба македонскиот теквондист беше поразен од Хрватот Оскар Ковачиќ со 0:2, актуелен светски шампион во оваа категорија.
Блажевски на шампионатот настапи под водство на помошник селекторот на репрезентацијата, Иван Крстевски.
