Македонската фудбалска репрезентација до 15 години забележа значајна победа од 3:2 против врсниците на Турција на тренинг-центарот „Петар Милошевски“ во Скопје .
Избраниците на селекторот Горан Станковски одиграа одличен натпревар и заслужено се радуваа на триумф против една од најквалитетните младински селекции во Европа. Иако Македонија имаше водство од 2:0 на полувремето, Турција успеа да се врати и да израмни, но во самиот финиш следуваше голема радост за нашата селекција.
Драган Петков уште во 2. минута го отвори резултатот, а предноста беше удвоена во 23. минута преку Стефан Стојановски. Во продолжението, турската репрезентација во 51. и 60. минута ги искористи грешките во македонската одбрана и преку Озбугуту и Озкан дојде до израмнување.
Сепак, во судиското надополнување Павел Димоски го постигна победничкиот погодок и и донесе голема победа на Македонија.
Македонија до 15 години:
Јован Дановски, Адел Мустафи, Еман Емини, Горан Ристовски, Калин Аврамовски, Дин Рожајли, Стефан Стојановски, Давор Танески, Јован Јанчевски, Драган Петков, Доротеј Христов.
Турција до 15 години:
Берк Кирман, Осман Курумахмут, Окан Џенгизхан Озкаја, Ахмет Ејмен Серт, Ејмен Ајјилдиз, Мустафа Енес Бозабали, Нојан Озкан, Ноа Никчи, Топрак Кок, Армаган Лортоглу, Ајаз Озбугуту.
