Битола уште од раните утрински часови живее за денешното големо ракометно дерби меѓу Еурофарм Пелистер и Вардар. Но, вистинската најава на дербито се случи многу пред првиот свиреж – точно во два часот по полноќ, кога навивачката група Чкембари подготви пиро-акција пред хотелот каде што престојува вардаровата експедиција.
Со силна бучава, огномет и автомобилски сирени, битолските навивачи направија атмосфера која ретко се гледа на овие простори, обидувајќи се да го нарушат мирот на скопјани пред денешниот дуел.
Настанот го споделија на социјалните мрежи со следната порака:
„Нема мирна ноќ за вардарци. Утре ќе ве докрајчиме“, беше пораката од „Чкембари“.
Уште една потврда за огромната напнатост околу денешниот натпревар, кој може значително да го одреди текот на битката за титулата.
Еурофарм Пелистер го дочекува лидерот Вардар во преполна сала, а гостите пристигнаа во Битола уште вчера за да се подготват во мир – нешто што ноќеска очигледно не им беше дозволено.
Дали оваа „добредојде“ од навивачите ќе има психолошко влијание врз играчите на Вардар или, пак, ќе ги мотивира дополнително – ќе се знае вечерва од 18:00 часот, кога градот на конзулите ќе пулсира во ракометен ритам.
Спектаклот е загарантиран, а трибините ќе ги красат и Комитите, кои пристигнуваат да го бодрат својот клуб во едно од најжешките гостувања во првенството.
