Оваа година УЕФА Фондацијата за деца ги додели своите годишни награди на 26 организации кои секојдневно работат на подобрување на животот на ранливи категории деца. Наградите се дел од иницијативата на УЕФА за поддршка на локални проекти што преку спорт и фудбал создаваат подобри услови за раст и развој на младите.
Секоја национална асоцијација, членка на УЕФА, номинира организација од својата земја. Фудбалската федерација на Македонија годинава го номинираше основното училиште и ресурсен центар „Иднина“, препознаено по успешната работа и развој на инклузивни практики за деца со попреченост и други ранливи категории. „Иднина“ е меѓу добитниците заедно со организации од Англија, Германија, Италија, Шпанија, Шведска, Австрија, Белгија, Грција, Србија, Ирска, Норвешка и други земји.
На 28 ноември, во хотел „Холидеј Ин“, беше промовиран проектот „Touch the Goal – Фудбал за секое дете“, финансиран токму од средствата од наградата. На настанот се обратија директорката на училиштето Лорета Андреевска, генералниот секретар на ФФМ Леонид Јандреоски, Сашо Огњеноски од Министерството за спорт и Душан Томишич од Комисијата за спречување и заштита од дискриминација.
„Стратешка мисија на ФФМ е да обезбедиме интегративни можности и права за сите во безбедна, здрава фудбалска и животна средина. Поради успешната работа на ОУРЦ ‘Иднина’ во полето на инклузијата, ги номиниравме за годишната награда на УЕФА Фондацијата за деца. Проектот ‘Фудбал за секое дете’ не е само подигнување на свесност, туку градење капацитети и знаења за работа со најранливите категории деца,“ истакна Јандреоски.
Инклузивната фудбалска програма ќе биде насочена кон ученици со аутизам и други комплексни образовни потреби, кои често се соочуваат со бариери во учество во спорт. Проектот ќе обезбеди прилагодена спортска опрема, обука за наставници и стручни лица, како и организирана врсничка поддршка за подобра социјална интеракција и еднакви можности за сите.
