Денес е денот „Д“ кога ќе се решава кој ќе ја заврши есенската полусезона како лидер во Првата женска фудбалска лига. Скопје го пречекува актуелниот шампион Љуботен, и тоа на терен кој важи за вистинска тврдина – место на кое тетовчанки веќе ја прекинаа својата победничка серија со ремито (2:2) против Истатов, тим кој го дели истиот домашен терен со Скопје.
Само еден бод ги дели лидерот Љуботен (37 бодови) од второпласираниот Скопје (36 бодови) – дерби кое носи огромна тежина за обете страни.
Скопје оваа сезона игра модерен, брз и храбар фудбал, предводено од млади фудбалерки кои се наметнуваат како идни сениорски репрезентативки. Токму оваа свежина и амбиција им дава реални шанси да се обидат да го симнат Љуботен од врвот.
Од друга страна, искуството е на страната на тетовскиот тим, кој располага и со квалитетни странски засилувања. Сепак, пред дуелот во Пржино останува дилемата – дали ќе успеат да го пронајдат победничкиот рецепт за три бода или барем за нерешен резултат? Само победа го прави Скопје есенски шампион, во секој друг случај Љуботен од врвот ќе го чека пролетниот дел.
Љуботен сезонава има 12 победи и едно реми, додека Скопје е со 12 победи и еден пораз – токму од Љуботен во Тетово (4:1).
Последните четири меѓусебни пресметки одат на страна на тетовчанки, кои секогаш победувале високо. Статистиката вели дека нивните дуели гарантираат голови – вкупно 20 погодоци на последните четири натпревари, што е просек од 4 гола по меч.
За денешниот меч делегирани се искусни судии. Главен судија ќе биде Вјолца Изеири од Гостивар, а нејзини помошници Елена Соклевска Илиевски и Тамара Цветановиќ од Скопје. Контролор на средбата е Петре Илиоски од Прилеп.
Натпреварот се игра на стадионот „Јован Мандаровски“ во Пржино, со почеток од 14:00 часот.
