Враќањето на Општинската фудбалска лига во Струмица дефинитивно е за поздравување – се врати фудбалот во струмичките села, одново фудбалските терени кои беа запустени се вратија во своето старо руво, се врати публиката на трибините, а сега со нетрпение се чека недела за да се следи фудбал.
По пет одиграни кола ОФЛ Струмица или Четврта лига по ранг на натпреварување се организира успешно, сите натпревари се играат без било какви проблеми, а целиот овој проект за реактивирање на публиката му припаѓа на раководството на ОФС Струмица предводено од претседателот Илија Илиев – Рома.
По пет одиграни кола во ОФЛ Струмица табелата станува интересна, „хаотична“ каде една победа може екипите да ги дигне високо, а пак еден реми или пораз да ги спушти ниско на табелата.
Екипата на Спартмани од Балдовци е на врвот од табелата како единствен непоразен тим со четири победи и едно реми, па со тоа тимот има 13 бодови. Но, екипата на Интер Кукла од Куклиш „диши во врат“ бидејќи има само бод негатива и се наоѓа на второто место на табелата односно има 12 бодови.
Веќе се прави некое одвојување на овие две екипи од останатите екипи. Огражден од Ново Село е на третото место со осум бодови, а по седум бодови израмнети во средината од табелата се Дрвош како четврти, Слога од Злеово како петта и Илинден како шести.
На седмата позиција е Единство од Пиперово со три бодови, а на дното засега без бодови со пет порази од толку натпревари е тимот на Напредок од Радово.
Најефикасен напад има тимот на Спартмани со реализирани 16 гола, а пак Огражден има втор најдобар напад со 15 постигнати погодоци.
Најдобар одбрана има тимот на Огражден со примени шест гола, а пак втора најдобра одбрана имаат Спартмани и Интер Кукла со примени седум погодоци.
Кога зборуваме за негативните статистики најлош напад имаат Напредок од Радово и Илинден од Добрејци со постигнати седум погодоци, а дефинитивно најлоша одбрана има тимот од Радово со дури 22 примени погодоци.
