Екипата на Кеги Моби има максимален учинок на стартот од новата сезона, откако во Штип во рамки на третото коло на Првата футсал лига го доби тимот на Мал Ајакс, кој е повратник во елитата со 2:5.
Ангел Гаштев со два гола и Димче Андов со еден гол беа стрелци за гостинот во првиот дел, а пак за домаќинот стрелаа Иса Дурмишов и Теодор Наков во првиот дел за 2:3 на полувреме.
Во вториот дел Петар Левков и Стефан Димовски ги поставија конечните 2:5.
Клими на домашен терен стигна до триумф од 8:6 над Јувентус Серава, а херој за домашните е Мартин Никовиќ со неговите три гола. Филип Грујоски имаше два погодоци, а по еден гол постигнаа Виктор Аризанов, Давид Крстески и Јован Лембовски.
За гостинската екипа хет-трик запиша Ќендрим Абази, Фестим Аџами беше двоен стрелец, а пак Омер Османи имаше еден гол.
Како што веќе објави Спортска Мрежа, шампионот Форца го декласираше Шкупи со 4:9, додека пак Проект го декласираше дебитантот Балкан, а вечерва во Крива Паланка се затвара третото коло со мечот меѓу Осогово и Бутел.
