По цели осум години и 21 натпревар, Вардар конечно ја совлада Шкендија во официјален натпревар! На дербито од десеттото коло во Првата македонска фудбалска лига, „црвено-црните“ извојуваа голем триумф среде Тетово, славејќи со минимални 0–1 (0–0) и се искачија на врвот на табелата.
Триумфот има и историска тежина – ова е прва победа на Вардар против тетовци од 2016 година, а херој на мечот беше Давид Бабунски, кој со ладнокрвна изведба од пенал во 49. минута му донесе огромни три бода на својот тим.
Првиот дел мина во знакот на внимателна тактичка борба. Двете екипи влегоа претпазливо, без многу ризици. Шкендија прва се закани со удари од далечина, но голманот Давор Талески беше сигурен и блескаше со неколку интервенции. Вардар возврати преку Мато и Омерагиќ, кои создадоа неколку опасни ситуации пред голот на Бубакар Гаје.
Најголемата драма во првото полувреме се случи во 31. минута, кога Шкендија имаше три шанси во само неколку секунди. Прво Бесарт Ибраими мајсторски биеше од слободен удар, но Талески ја одбрани топката со атрактивна парада. Потоа следуваа обиди на Спахиу и повторно на Ибраими, но Вардар со пожртвувана одбрана ја сочува својата мрежа.
На почетокот од второто полувреме дојде и пресудниот момент. По корнер, Ибрахим Алхасан непотребно играше со рака во својот шеснаесетник, а судијата Стојанче Трпчевски веднаш покажа на белата точка. Давид Бабунски ја презеде одговорноста и со сигурен удар по средината донесе водство за Вардар – 0–1.
До крајот од натпреварот, Шкендија се обидуваше да израмни, но Вардар со одлична дефанзива и смирена игра го задржа резултатот. Во 87. минута Бесарт Ибраими постигна погодок, но по ВАР-интервенција истиот беше поништен поради офсајд, што ја скрати радоста на тетовската публика.
Со овој триумф Вардар се врати на првото место на табелата со 24 бода, еден повеќе од Струга. Шкендија со овој пораз падна на четвртата позиција со 21 бод.
Во следното коло Вардар ќе го пречека Силекс во уште едно дерби на врвот, додека Шкендија ќе гостува кај Брера во Струмица.
