Работнички дојде до нова победа во домашниот кошаркарски шампионат, совладувајќи го Кожув на гостински терен во Гевгелија со резултат 81-86, во натпревар од четвртото коло на македонската Суперлига.
Со новите засилувања кои конечно се регистрирани по укинувањето на блокадата, изгледаат како целосно прероден тим, а тоа најдобро го покажуваат резултатите во последните две кола. Момците на Владимир Мирковски одиграа одличен натпревар и успеаја да направат голем пресврт во завршницата во салата „26 април“.
Работнички губеше со 61-69 на влезот во последната четвртина, но со серија одлични напади предводени од Американците Хатсон и Томпсон, како и капитенот Ефремовски кој погоди клучна тројка, гостите го израмнија резултатот на 72-72. Потоа следеше нова серија од 0-7, со која Работнички се одлепи на плус седум поени (73-80) и мирно го приведе натпреварот до крај.
Во тимот на Работнички најефикасен на мечот беше Томпсон со 23 поени 4 скока и 7 асистенции, додека Ефремовски придонесе 20 поени 4 скока и 1 асистенција, а Хатсон оствари дабл-дабл учинок – 17 поени и 10 скока. Во тимот на гевгеличани, најефикасни беа Николас со 25 поени 7 скока и 5 асистенции, и Парвис со 20 поени 4 скока и 1 асистенција.
