Техничкиот директор на Фудбалската федерација на Македонија, Ѓорги Христов, учествуваше на семинар за техничко лидерство организиран од ФИФА и УЕФА, кој се одржа во Будимпешта.
Настанот ги обедини техничките директори од земјите членки на УЕФА со цел размена на искуства и унапредување на знаењата во управувањето со техничките програми и развојот на фудбалот. Преку интерактивни сесии и дискусии, учесниците беа запознаени со ресурсите и поддршката што ФИФА и УЕФА ги нудат за долгорочен фудбалски развој, како и со најсовремените програми за едукација и лидерство.
„Семинарот е одлична можност за размена на искуства и идеи со колеги од целиот свет. Преку вакви иницијативи добиваме насоки како да го унапредиме техничкиот развој на фудбалот во Македонија, од грасрут до елитни категории“, изјави Ѓорги Христов.
Тој додаде дека развојот на квалитетни технички лидери е клучен за напредокот на фудбалот, како на теренот така и надвор од него, со цел да му се даде шанса на секој талент и фудбалот да расте на сите нивоа.
ФИФА преку континуирани инвестиции во програмата FIFA Technical Leadership има за цел да ги подигне стандардите на управување, да поттикне иновации и да промовира одржлив раст, создавајќи нова генерација фудбалски лидери кои ќе придонесат за напредок на фудбалот на глобално ниво.
