Осмото коло од Втората лига го носи и дербито на Истокот кое се игра во Радовиш меѓу Детонит Плачковица и лидерот Брегалница. Дерби на двајцата штипски стратези Горан Здравков против Трајче Сенев на Градскиот стадион во Радовиш.
Здравков е поранешен тренер на Брегалница, но како играч исто така го носеше дресот на штипската фудбалска гордост, повеќе од јасно дека го познава тимскиот дух и атмосферата на својот поранешен клуб.
Брегалница е единствениот непоразен тим во Втората лига со скор од пет победи и две ремија, но во Радовиш за „сините“ на Сенев ќе биде навистина тешко гостување, минатата сезона никој не успеа да триумфира, а сезонава само Новаци успеа да го совлада Детонит на негов терен, но сега радовишани се стабилизирани и повеќе од јасно е дека ќе сакаат три бода и триумф над лидерот Брегалница.
Во новата сезона Брегалница има за цел експресно да се врати во Првата лига и засега одлично им оди на штипјани кон таа цел, а тоа може да направи притисок на гостувањето во Радовиш, бидејќи Детонит го нема тој притисок.
Од друга страна одличниот Башкими кој има отвори амбиции за Прва лига, како Арсими и Кожуф кои од втор план сакаа влез во Прва лига им прават притисоци на фаворитите Брегалница и Македонија ЃП кои на секој меч одат само по три бодови.
Детонит на последните пет натпревари има скор од три ремија и две победи, а од друга страна нападите и на двете екипи се идентични со по десет постигнати погодоци, но Брегалница е нешто подобра во одбраната со примени четири во однос на тоа што радовишани имаат примено седум погодоци.
Брегалница нема право на грешка, бидејќи повеќе од сигурно е дека ќе го загуби лидерското место, па дури може да се спушти и до третото место, додека пак Детонит Плачковица со три бодови ќе прогресира на табелата и ќе се вмеша одново барем за третото место и баражот за Прва лига.
Дербито на Истокот се игра в сабота од 14 часот на Градскиот стадион во Радовиш.
