Фудбалската репрезентација на Македонија освои голем бод на гостувањето во Гент, откако одигра без голови (0:0) против ѕвездената Белгија и го задржа првото место во квалификациската група за Светското првенство 2026.
Огромниот успех и новото големо издание на избраниците на селекторот Благоја Милевски предизвикаа бројни реакции и честитки од целата спортска јавност, а прв кој јавно се огласи беше претседателот на Фудбалската федерација на Македонија, Масар Омерагиќ.
„Браво, браво, момци. Со цело срце – за вас!“, напиша Омерагиќ во кратка, но искрена порака објавена веднаш по натпреварот.
Првиот човек на македонскиот фудбал испрати јасна поддршка и гордост кон репрезентацијата, која и понатаму ја одржува импресивната серија на официјални натпревари без пораз. Македонија останува лидер во групата со еден бод повеќе од Белгија и се наоѓа пред историска можност – пласман на Светското првенство во 2026 година, што ќе се одржи во САД, Канада и Мексико.
