Македонија освои голем бод на тешкото гостување кај Белгија откако одигра 0:0 и со тоа останува на врвот од табелата од нашата група во квалификациите за СП 2026.
Голманот на македонската репрезентација Столе Димитриевски, беше на вистината на задачата и имаше фантастични интервенции и е еден од најзаслужните за овој голем бод.
Веднаш по натпреварот, Димитриевски истакна дека дефанзивно биле перфектни.
„Доста тежок натпревар на гостински терен во Гент, навистина тие беа одлични со одлична игра во офанзива. Ние мислам дека имавме перфектен натпревар во дефанзива. Ние фалеше малку повеќе да нападнеме и повеќе да одиме по резултат, да го добиеме натпреварот. Но, сепак е тешко од прва зона да излезеш во трета зона за напад, зошто тие притискаат, константен притисок, но дефанзивно мислам дека одигравме перфектно“, вели голманот на македонската репрезентација Столе Димитриевски.
Веќе фокусот се става на следниот предизвик против Казахстан, меч кој се игра во Скопје и пред верната публика.
„Од првите натпревари од квалификациите ние одиме на победа, за нас прво место е историја, натпреварот со Казахстан ќе биде доста тежок, но играме на домашен терен со наша публика, мислам дека на домашен терен може да дојдеме побргу до таа победа. Но, треба да се одмориме, да се подготвиме и да одиграме фантастичен натпревар со цел да го добиеме истиот и да продолжиме напред до прво место до пласман на Светско првенство“, рече Димитриевски.
