Македонија ЃП ја отвори деветтата рунда во Првата македонска фудбалска лига со убедлив триумф од 4-1 против Арсими, обезбедувајќи ги трите бода и искачување на табелата кон средината. „Лавовите“ на својот терен ја потврдија улогата на фаворит и со ефикасна игра стигнаа до најубедливиот сезонски резултат.
Домаќините го наметнаа темпото уште од самиот старт и рано стигнаа до предност. Во 13. минута Клинтон Осеи одлично асистираше, а Ѓорѓи Стоилов прецизно ја затресе мрежата за 1-0. Само осум минути по почетокот на второто полувреме, по една мешаница во одбраната на гостите, Мартин Талаков беше најснаодлив и ја зголеми предноста на 2-0.
Арсими сепак успеа да врати надеж во 68. минута преку Шефик Шефити, кој со убав удар го совлада голманот Јанков. Но радоста траеше кратко – нивниот фудбалер Џемиљ Јахији веднаш потоа доби втор жолт картон и остави простор за уште поголема доминација на „лавовите“.
Искусниот Гереро во 81. минута ја искористи грешката на голманот на Арсими и ја зголеми предноста на 3-1, а во самиот финиш Кире Маркоски со прецизен удар го постави конечниот резултат – 4-1.
Со оваа победа Македонија ЃП ја запиша својата четврта сезонска радост и стигна до 12 освоени бода, додека Арсими остана со негативен биланс и ќе мора да бара рехабилитација во следното коло. Во новата рунда „лавовите“ ќе гостуваат кај Работнички, а Арсими ќе има тешка задача на гостувањето во Кавадарци против Тиквеш.
