Македонската судиска двојка Димитар Митревски и Благојче Тодоровски доби нова задача од Европската ракометна федерација и по вторпат сезонава ќе делат правда во елитната Лига на шампионите.
Битолчаните ќе ја водат средбата од четвртото коло во групата А меѓу Спортинг Лисабон и францускиот вицепрвак Нант. Натпреварот е закажан за 8 октомври во салата „Жоао Роча“ во Лисабон, со почеток од 20:45 часот, а делегат на ЕХФ ќе биде Шпанецот Хуелин.
Ова е втора европска задача сезонава за македонските арбитри, откако пред еден месец го водеа дербито меѓу Алборг и Веспрем во Данска.
Во рамките на истото коло, македонскиот шампион Еурофарм Пелистер ќе гостува во Полска кај Висла Плоц, а таму судискиот пар ќе биде составен од Данците Мадсен и Хансен.
