Женската ракометна репрезентација на Македонија нема да го одигра планираниот натпревар против Грција на меѓународниот турнир „Трофеј Македонија“ во Охрид. Причина за тоа е вирусна инфекција која зафати дел од грчките ракометарки, па нивниот национален тим не е во можност да продолжи со учество на турнирот.
Ракометната федерација на Македонија преку официјално соопштение потврди дека Грција се повлекува и им посака брзо закрепнување на погодените ракометарки. Во исто време, РФМ им се заблагодари за досегашниот придонес и учество на турнирот.
“Ракометната Федерација на Македонија ја информира спортската јавност дека женската ракометна репрезентација на Грција нема да го продолжи своето учество на меѓународниот турнир „Трофеј Македонија“. Причина за ваквата одлука е вирусна инфекција која зафати дел од ракометарките на грчкиот национален тим. Македонската ракометна федерација им посакува брзо закрепнување на ракометарките од Грција, и упатува искрена благодарност за нивното учество и придонес кон турнирот”, стои во соопштението на РФМ.
Со оглед на тоа што денешниот меч требаше да се игра од 16:30 часот, Македонија службено ќе го добие. Тоа значи дека нашиот национален тим ќе го насочи вниманието кон исходот од дуелот меѓу Тунис и Египет – натпревар кој ќе има клучна улога за конечниот расплет и можноста Македонија да се бори за првото место.
