Македонската тенисерка Лина Ѓорческа го заврши настапот на турнирот W75 во Куршумлијска Бања, Србија, откако во четвртфиналето беше поразена од Австријката Лили Тагер со 2:1 во сетови (6:3, 5:7, 7:6 (7:5)) по маратонски меч што траеше два и пол часа.
Ова беше втор триумф на младата Австријка над Ѓорческа во последните пет дена, бидејќи пред само една недела во Букурешт исто така ја совлада во финалето.
Дуелот започна подобро за Тагер, која со ранен брејк поведе со 3:0. Ѓорческа успеа да врати дел од контролата и намали на 4:3, но сепак првиот сет заврши во корист на противничката. Во вториот сет, при водство од 4:3 за Тагер, нашата тенисерка успеа да направи серија и со 7:5 да израмни на 1:1. Одлучувачкиот трет сет повторно донесе неизвесност – Ѓорческа спаси меч топка во десеттиот гем и изедначи на 5:5, но на крајот тај-брејкот го доби Тагер со минимални 7:5.
И покрај елиминацијата, Ѓорческа ќе освои 16 ВТА поени за настапот и на новата ранг-листа ќе се најде меѓу најдобрите 200 тенисерки во светот.
