Оваа сабота и недела во Крушево ќе се одржи деветтото издание на FIS Rollerski Cup „Тоше Проески“, меѓународен натпревар во ролерски скијање, во организација на Скијачката федерација на Македонија.
Натпреварите ќе се одвиваат на регионалниот пат Кривогаштани – Крушево, во повеќе дисциплини за различни возрасни категории. Сениорите (мажи и жени) ќе се натпреваруваат на дистанциите од 7,5 и 10 километри, додека децата ќе имаат трки на 1, 2, 3 и 5 километри.
Се очекуваат околу 50 натпреварувачи од Македонија, Србија, Грција, Португалија, Унгарија, Ирска и Швајцарија да земат учество на овој престижен настан, кој го носи името на големиот пејач Тоше Проески.
Крушево, со својата убавина и планински амбиент, и оваа година ќе биде идеален домаќин за натпреварувачите и посетителите, нудејќи совршена комбинација од спортска енергија и туристички доживувања.
Министерството за спорт, УНИБанка, Меѓународната скијачка федерација (FIS) и Општина Крушево се главни поддржувачи на настанот, додека клубот Ски Нордиски е технички организатор на трките.
